تذكرني ذعاذيع الهـوى والشمـس مـزورّه
على نحو الغياب اللي قطع قلبي من انفاسـي
وصلت أقصى حدوده لين طحت ومتّ من حرّه
وصارت لذة الدنيا علـى همـي ووسواسـي
أهيم أحيان في نفسي ونـوب أهيـم فالغـرّه
وتاخذني سواليف الزمـان المغـرم القاسـي
مدامنّك سرقت القلـب واخذتـه علـى غـرّه
وعنّيت الخدين ولين صـار الوالـه الواسـي
حرام انّك تخلّيني معاك أمشـي علـى الجـرّه
وتتركني على فال الطريق آعيـش هوجاسـي
وحرام انّي ليا شفتك بديـت آعـاود الكـرّه
واغنّي بك لحون
العشق في عودي ومرواسي
صحيح انّي تبعت ابليس والشّيطان أبو مـرّه
وصاحبت الهواجيس وضويت وصاحبي راسي
جرحني لين ثوبي والـزرار أحيـان مـا زرّه
والوم اللي يسوّي مثلي ولا انقد على ساسـي
تطاولت البحور ولا حصل لـي أملـك الـدرّه
وسوّيت اله شيّ(ن) مادخل للحين في راسـي
تصدّ أحيان وتقفّـي واقـول البنـت منغـرّه
يحقّ الها الغرور اللي جبرني وانتهى باسـي
تحيّرت وتمنّيت انّـي اصبـح عالـم الـذرّه
عشان آقول يعطيني غلاهـا نـور نبراسـي
عجزت القى جواب (ن) يقنع المجروح لو مرّه
وتهت وطالت ايّامي علـى ربعـي وجلاّسـي
تعوّذت وذكرت الله عن خيـره وعـن شـرّه
وفي روحي هواجيس(ن) تذكّرني وانا ناسـي
حرام اكذب على نفسي ولو مثقـال مـن ذرّه
وانا عندي ضمير وعارف(ن) قدري ومقياسي
أقول الك الحقيقـة والحقيقـة حلـوه ومـرّه
على طول الجفا مارحت افكّر في مدى ياسـي
زمان
العشق سوّابي سـواة العبـد والحـرّه
على كل الدروب آجيه بس الأقشـر سياسـي