[همس الهدوء...]

مذبوح لك مشتاق و الشوق فضاح و القلب ما به غير كلمه وحيده كلمة احبك عطرها من زمن فاح و النفس غيرك ترفضه ما تريده

++ سارن البنات و خطفن على ضبابه عيادة الاسنان ....طبعا اليوم اخر يوم فالصيفي و عقب اسبوع بتسافر العايله العمره ...كل سنه تقريبا اتسافر عايلت حمد العمره و كل سنه ايوديهم ولدهم العود سعيد ..بس السنه سعيد اتعايز عن السيره و بالتالي بيسير حمد و عياله سلطان و البنات لطيفه عايشه و وضحه و حرمته عفرا..اما من عايلت المرحوم سيف فاللي بيسير البنات فاطمه ضبابه و امهم بخيته و احتمال اتسير اختهم فاخره اللي معرسه طبعا اذا ساروا اهل ريلها....و بيسر أحمد على اساس ايكون محرمهم و اخوهم الصغير اخر العنقود عمران..اما عمير ريال البيت فكنسل لانه حرمته حامل في شهورها الاولي و هم يتريون هالشي من اربع سنين خصوصا انها ما يابت حد بعد ولدها سيف اللي يبلغ من العمر خمس سنوات..
فاطمه: اقول لطووف اشوف البي اتش اس مسوي تنزيلات اشرايج انحول
لطيفه: ما شالله عليج بنت سيف .... امررره ثمانيه سلندر عنبوج امواصله من البارحه و توج ممتحنه وين فيج هبه على السوق بعد؟؟
فاطمه: تف تف تف عليه ...و من شر حاسد اذا حسد...حولي يالله اشوف القمصان اللي على الفاترينا حلوات حولي بناخذلنا كم لبسه
لطيفه: ياختيه مافيني
فاطمه: بتحولين ولا لا ...ان ما حولتي الصمامه اللي جدامج ما بتحول بتيلس حارستنج ( تقصد الدريول ابراهيم)
لطيفه: لا حووووول ... يالله بحول احسلي لا اجابل هالصمبي
و هن محولات شافتهن ضبابه
ضبابه: ايه ايه وين سايرات ؟
فاطمه: بي اتش اس
ضبابه: لا و الله ... لو يدري أحمد و الله...
لطيفه: ادري بيعقرنا ...بيذبحنا ...بيدوس في بطونا ...عنبوه مقصب فاتح احمدووه هاذا..
ضبابه: عيل منوه ايفججلكن روسكن انتن رواحكن فالسوق
فاطمه: شوه اتشوفينا من هالخايساات ..تبين يالله ما تبين سيري ارتزي فالسياره ولا تصدعيلنا روسنا
دشن البنات المحل و قعدن يتنقن ...في اشياء حلووه.. طبعا ضبابه الجسم حدث ولا حرج...رهيب..اما لطيفه و فاطمه الله لا يرويكم..مساويط...هلكانات..
فاطمه: اقول لطوف شوه رايج بهالقميص؟
لطيفه: حلوه الوانه... رويان...ما شي سموول
فاطمه: لا بس ميديم ...بس اتصدقين الميديم بيي عليج انتي زين.. بس الداعي انا بضييع فيه
لطيفه: ما عليج خذيه ... خليفه اخويه واعدنيه ايبلي حبوب فتح الشهيه من بريطانياا ..و مرره بنحط الضو عليهن
فاطمه: هزرج...ياختي سوينا المستحيل بس ما شي فايده
لطيفه: خذيه لا تخلينه في خاطرج..اقول فطيم
فاطمه: هلا
لطيفه: مب جنه هاذا يتبع ضبوب
فاطمه: هيه و الله ..عنلاتها و من الصبح يالسه تهزبنا ..صبري بزقرها
لطيفه: حوووووه ايه لا تزقرينها بيعرف الاسم...خلينا بنأشر لها
أشرلها بس الحبيبه مندمجه و رافعه الغشوه بس مغطيه اطراف ويهها و يالسه تشتري...اول ما لاحظتهن يتهن على طول
ضبابه: ااااايييييه بسم الله منكن ما تعرفن تزقرن زين... اتقول قروود من بعيد يالسات اتأشرن لي
لطيفه: حبيبتي اذا نحن قروود فانتي الشيخه من نفس الفصيله ..ما تشوفينه هاذا الزفت من الصبح يلحقج
ضبابه: ادري اصلا هاذا يتبعني من يوم ما كنت فالعياده
فاطمه: يا سلااااااااام فرحانه وايد بعمرج .... و انتي عادي عندج..لا يكون شاف ويهج
ضبابه: هيه شافنيه ...شدراني انه في حد فالعياده انا فجيت الغشوووه..و بعدين طز فيه لا تعطنه ويه
فاطمه: و يوم بيلحقج الشيخه و بيشوووف رقم السياره هاذيج الساعه شوه بتسوين ؟؟؟؟
ضبابه: ياختي حشا انتن متعقدااااات..لا تكبرن السالفه و هيه ما ترزا!!!
لطيفه: و الله انا اشوف انه السالفه ترزا ...ولا شوفيه شوه يالس ايسوي وراج الحينه؟؟؟؟
فاطمه: دخيييييييييييييييلكن الشرده ...اللهم اني بريئه...وين بنطس و بنشرد عنه الحينه؟؟
لطيفه و عيونها فيها لمحت خبث: اييكن الشور...تبعني
ضبابه: يالله لطفين انتي و من وراج الطوفان..
لطيفه اتموووت على المغايض...و يوم ايعدي على لطوف يوم من دون لا تسوي شي غريب ولا اتشاكس فيه معناها لطيفه اتكون مب صاحيه فيه...مب طبيعيه ..
++ الخام وين يبا يلحقنا...ولا بعد بصراحه نستاهل بنات ارواحهن فالمحل و حضرت الاميره ضبابه كاشفه عن ويها جدامه عيل ما ينلام يلصق فينا...بس شوه فيها و الله انا حشام و مستورات ولا يبين علينا انا رواعي حركات و السوق تقريبا فاضي خاصه انه اليوم الخميس و الساعه الحينه تقريبا 12 الظهر ...بس و الله يا يرويه ..تمت لطوف كل شوي اتروح مكان تبا تتأكد اذا هوه بالفعل يلحقهن ولا لا ...بعد حرام نظلم الريال جاد عنده حايه وياي يقضيها...طبعا القافله كلها ورا لطفين ...بس بالفعل طلع الريال مب ناوي ايفارج ..اوكي اوكي دواك عندي بشوف شوه بسوي...
سارت لطيفه بالبنات صوب قسم الملابس الداخليه ..شوووفوو المكر انتو...
ضبابه: ااااايه لطوووف غربلات عدوج وين تبين ....يالفضييييحه
لطيفه و هيه ترفع وحده من القطع اللي موجوده فالقسم حق فاطمه و ضبابه...طبعا الريال من شافهن في هاذا القسم بصراحه احترم حاله و استحا على ويهه و فارج
لطيفه: شوه رايكن حلو الاسود لاه؟
ضبابه و ويها طمامه: لطفين عاد قلنا بتتصرفين بس مب جيه ...فضحج الله نزليه و لا و الله تراني يا سير عنكن الحينه
فاطمه: اشكر فنننج و الله قفططططططط....سر سر ألقط ويهك هااكووه متناثر على الارض
لطيفه: ما تبيهم غير العين الحمرا
حاسبن البنات و طلعن ....ركبن السياره و اول ما تحركت السياره...مرت عدالهم سياره مرسيدس كوبيه عنابي و عليه عاكس رقم ثنائي أخضر..بالاحرى شخطه عدالهن ووووويل ألين ما غبرت سيارتهن عدل و عقب روح
لطيفه: يعلها طرشتك
فاطمه: ههههههههههههه...حشا من الضيقه حليله ارتفع الضغط عنده
ضبابه: حرام عليكن و الله انه حليو
فاطمه: هو نفسه اللي كان فالمحل؟
ضبابه: هيه
فاطمه: شدراج؟؟؟
ضبابه: شفته منزل الدريشه
لطيفه: ضبوب جنج قمتي تخووورين...وين سلطان عنج
فاطمه: امررره ما عليج التقرير اليوم بيوصله
ضبابه و قدها بتدمع عينها: بس عااااد حرام عليكن..و الله اني ما قصدت فديتكن ما تيبله طاري
فاطمه: هههههههههههههه..مستحيل و اخيرا لقينا شي انهددج به
لطيفه: تيكي ما عندي مانع بس اتخطفيني على البيتزا هت و على حسابج
ضبابه: ما عليه ما عليه بس سلطان مايوصله شي
لطيفه: بفكر ...بشاور عمريه
ضبابه: يعلللللللللللللللللني ما احلمكن قوولن امين لطفين و يههههههههد....حرام عليج
لطيفه: انزين شوي شوي على عمرج شوي و بتموتين ..امره قيس وليلي ..خلاص مابقوله بس اصطلبي ولا تيلسين اتبصبصين مره ثانيه ولا تراه و الله بزوالج
ضبابه: من اليوم مشتغله عليه حماه
لطيفه: بغيتي حياج ما بغيتي اتعرفيهن عراقيب الجبيب ( احدى المناطق) سيري خمسي ويلات فيهن لين مايدور راسج
++ انتهي هاذا اليوم و اخيرا ..عدى على خير..حشا و الله اني قلت انه حد داعي علينا من ظهرنا و نحن ما نسير بزياده..من مشكله ألين ثانيه...بس الصراحه كان يوم حلووووووو، يعيبني اليوم اللي اتكون فيه مخالفات وايد مادري جيه استانس من الخاطر ..اهم شي الصيفي و خلصناه وعقبال النتيجه ان شالله ...انا مادري احس اني بنجح لاني دووم ما ادرس بس الله يوفقنيه ...اكيد الوالده داعيتلي...اما المصيبه هناك عند فطوم ياخوفي ترسب امرررره مالها خص هالبنت فالدراسه و مادري ليش معزره اندش الجامعه..يالله تنجح و تفكنيه لاني مستحيل اخذ اي مساق فالجامعه من دوونها...حتا افكر ادش كليه و تخصص ادبي عشان ما نتفارق..ظاهريا فاطمه هيه اللي ما تقدر تصبر عني...بس اللي ما يعرفه الكل انه انا اللي ماقدر اصبر عنها...علاقتيه بأهليه فالبيت محدوده...يعني سعيد اخويه العود هوه الوحيد اللي علاقتيه به وايد قويه بعد ابويه طبعا..بس ابويه الله يهديه طول السنه ما نشوف زوله فالشتا مقناص و الصيف سفر ويا الشيوخ...و اخويه خليفه طول فترت مراهقتيه ما شفته طبعا مب لانه مختفي... بس لاني انا اللي ما اقر فالبيت يا اكون في سويحان عند يدتيه و عمي مبارك او اكون في بيت عموه بخيته و عقب ما انتهت فترت مراهقتيه الذهبيه سافر الاخ الي نوتنجهام-بريطانيا دراسه...اما عايشه اختيه هاذي كائن فطري يعني ايعيش على النت بس ... الله يسلمكم تدرس فالتقنيه و حياتها كله سوالف اعجاب ما اعجاب و فلانه سوت و علانه انخطبت...طبعا سوالف بنات التقنيه معروفه!! يعني حش في حش عشان جيه اتجنبها ..اما وضحوووووووه..فديت الوضيحي انا جاني ما صبر عنها ...وضحه صف خامس بتروح سادس...دلع في دلع...الكل يحبها و الكل ايدلعها..طبعا ماروم انسا اختيه العوده شمسه اللي هي عقب سعيد اخويه حبوبه العايله معرسه ماخذنها عمير ولد عمتيه بخيته و عندها ولد واحد بس و هو سيف و ان اشا الله الحينه هيه حامل الله يوفقها و الله اني احاتيها هالانسانه بسيطه و ماخذه الدنيا كلها ايزي ...و اخيرا سلطان اخويه و الله بصراحه شوه اقولكم...ابدووووووووووووي....يعني الريال راعي عزب ورجاب و مراكيض...هيه صح و عشق بعد .... العالم كله اتعرف باللي بينه وبين ضبابه..حتا البشاكير ...و الكل مسمنهم العقيلي و ميا...اغلب الوقت ما شوفه بس الفتره الاخيره شاد حيله لانه وراه ثانويه عامه السنه اليايه....الشيخ راسب سنه اول ثانوي..يعني اكبر عن ضبابه بسنه..هيه صح فييه انسانه نسيتها...اصلا شي طبيعي انساها ...أمايه ( عفرا) ... مادري ايام احسبها اتحبنيه انا اكثر وحده من خواني و اتحن عليه بشكل غريب و احيانا احسبها بعيده عني ولو انها لحظات نادره...مادري بتقولون اصلا ما فيه ام تكره عيالها بس والله انها هاي الحقيقه مرات احسبها انها بعيده عني...بس ماشي من دووون سبب؟؟؟ اكيد فيه سبب ...اكيد