مشاهدة النسخة كاملة : جدي صار سبرمان 0000


ملك بكبريائي
06-09-06, 11:58 PM
جدي صار سبرمان


مرة من المرات كنت انا و جدي قاعدين نشرب (بايسون) و نتاغر (انواع الوصاخة) المهم انا خليته يتاغر بلحاله و رحت انوم و جدي راح يشوف المصارعة <يموت بشيء اسمه ستيف أوستن> لدرجة انه مرة من المرات راح للحلاق و قال له احلقـني صفر و صنفر راسي و حط سكسوكة (وشلون يحطها مدري) لكن الحلاق كان محترم و اتصل على شهار عشان يخاذونه قاموا ارسلوا له هليكوبتر تقديرا لحالته و بالطقاق طلعناه ..
و جدي ما يعترف بشيء اسمه (دكتور) الدكتور هو أطقع ما تشوف عينه حتى انه مرة من المرات كل كرتون كامل يقول علشان اطيب بسرعة .. المهم و جدي يتابع أوستن بحماس و شغف بالغ (بالغ ولا طفل ههههه) طلع كمية من الحبوب من مخباته و قعد ياكل (صار حب هذا مهوب حبوب) وبعد عشر دقايق انسدح جدي و تغير لونه للأزرق (أكيد هلالي) و قعد يصارخ و تغير صوته لين صار صوت رجال (كان صوته صوت غراب) انا جيت انقذه (وخر عن 911) و شوي قام و قال:وش تبي انت ؟! قلت له : اخس يا جدي صار صوتك صوت رجال .!.!. قال: لا يكثر بس .. ما تخبر مشكلة اروح احلها (وش عند كوفي عنان) قلت:الا يا جدي . قال: لا تقول جد مرة ثانية أولا: انا اسمي براد بيت (واضح تأثير الحبوب) ثانيا: اسمي الجديد (سبرمان) المهم ما تخبر مشكلة احلها ؟! قلت :الا مطحس ولد البدو قد لعن خامسي (يقول ليه اعطيك هدية ولا تعطيني) قال : طيب ، وين بيتهم ؟ قلت له : امش طوالي بعدين بتل بعدين امش سيدا بعدين دز قدام بعدين بيجيك مطب لا تاكله و بيجيك بيت على اليمين عنده شايب منسدح يتشمس خل هالبيت على يسراك و امش سيدا بعدين بيجيك ولد يقطع الشارع انتبه لا تصدمه بعدين بيجيك اثنين فارشين بحوض ددسن و معهم حب و زمزمية شاهي (يقالك كشتة) و روح طوالي بيجيك حرف تي إذا صقعت بالجدار بتلقى على يمناك جرس علق على الجرس و بتسمع واحد يلعنك و يلعن ابوك و امك و بيفتح لك الباب و هو لابس فنيلة و صروال داخلية و معه قوطي شاهي بعدين قل له وين مطحس و بيقول لك شف بيتهم ذاك البني اللي عنده زبالة صفراء ولا عاد تجينا لألعن جدفك (يلعن أم الكروكي)
طق بابهم بيدك (أجل برجله يعني) لأن جرسهم خربان بعدين بيطلع واحد صرواله وصخ هذا هو مطحس (بدري) قال سبرمان : يالله مشينا نطقه ... قلت : أي مشينا يبو !؟ رح طقه بلحالك ! قال سبرمان : لااااااا يبو (زحف جدي و صار يستخدم مفرداتي) انت تعال شاهد و استمتع (شاهد و استمتع .. صار اشتراك الـ art‏) قلت له : طيب .. جيت يا ابو اوستن (هيضته بهالكلمة) و نروح لـمطحس (حسب الكروكي المرفق و يمنع منعا باتا اصطحاب الأطفال أو دخول المغاتير) طقيت الباب بكل فخر و اعتزاز لأني اعرف نتيجة المطاقة أكيد انا الفايز ولو معي جدي سبرمان .. المهم فتح مطحس الباب بصرواله المعهود (طخ طاخ طيخ دردب بوم)
النتيجة : عيال الحارة مجتمعين .. مطحس منسدح .. جدي قاعد على صدره و يبقسه و يقول له : أجل ما عطاك هدية يا ابن اللذينا !!! و يقوم جدي و يتفل بوجهه و يروح عنه و ياخذني معه (صفر على الشمال) ..
و حنا راجعين للبيت شفت مثعي (مدري وش تبي اسامي عيال الحارة) قلت : يا سبرمان شف ذا مصفقني يوم كنت في رابع ابتدائي (نصاب) ..قال : لبق على جنب ..
حعوووووو (صوت فرامل) نزل جدي بلحاله و استلم الرجال تشويت و خنقه لين طلعت عيونه و قبصه لين مات (يلعن أم الأسلوب) و يمسكه برجله و يسطحه في واحد من ذا البيوت (أفلام كرتون) و يركب السيارة و ندز قبل تشوفنا الشرطة و فجأة شفت سبع دوريات ورانا و انحاش يمين يسار ابي اضيع دورية وحدة ما قدرت و يقول لي براد بيت : هات الطارة ... و نتبادل انا وياه الأماكن (ما صار إحراجات أثناء تبادل الأماكن .. بس ابن اللذينا يقول انت الي رح من فوق) و يستلم الطارة و خذ يا تنطيل انا شفت دوريتين ضيعو و ثلاث خشوا بجدار و ثنتين اطلق عليهم النار ) ولو توني ادري ان جدي يعرف يستخدم الآر بي جي) و يدز جدي لمركز الشرطة و يكسر الحواجز و يخش بالسيارة و يعرضها و ينزل و في الوقت العصيب هذا و حنا بين فوهات مسدسات الشرطة (يمديكم على فوهات) اغمى على جدي و طاح و راحت عنه الحالة السوبرمانية ...... و من جد قمط وجهي وش بسوي مع 50 شرطي مسلح ...
ولو سلمت نفسي من بيصدق اني بريء ما سويت شي .. و ان جدي الي ذبح البشرية .. معقولة اقول للضابط جدي اللي جلد مطحس .. جدي اللي ذبح مثعي .. جدي اللي ضيع دورياتكم و لعب فيهن .. جدي اللي اطلق من الآر بي جي .. بعدين قلت لنفسي خلك رجال ولا تسلم نفسك وتوزيت ورا موترنا جنب جدي (خلاص صرنا ثنائي) و ازعجتني الشرطة "سلم نفسك ..بالله سلم نفسك .. تكفى يا ابن الحلال سلم نفسك .. سلم نفسك و نعطيك عسكريم" و الصراحة الشرطة كانوا خايفين منا ما درو ان جدي صار عادي معاد هوب سبرمان .. المهم شغلت مخي (كان طافي) و فكرت ليش ما اسوي لجدي خلطة حبوب و بايسون (عشان يصير سبرمان) بس يا ولد ما معك بايسون ؟ وش اسوي ؟ وش اسوي ؟ ....... قلت يا ولد مالك الا هالطريقة و اطلع راسي من فوق الموتر و انادي الضابط ،قال : وش تبي ؟ سلم نفسك قبل نطب عليك ... قلت له : جب لي بايسون و اسلم نفسي .. قال لعسكري جنبه : يا فلان قم جب له بايسون من البقالة .....
راح فلان للبقالة (لا تصدقون ان اسمه فلان , كل السالفة اني مابي اشهر بالرجال خخخخخ ) و قعد خمس دقايق و جانا و قال له الضابط : وين البايسون ؟؟!
قال: يا حضرة الضابط أبك البايسون غالي بريالين ولا جبته لكن جبت له ببسي ان كانه يبيه ..
قال لي الضابط : انت ما تبا ببسي ؟
فكرت و قلت في نفسي
(بايسون + حبوب = سبرمان)
(ببسي+حبوب= يمكن جونقر)
قلت للضابط : هاتوا الببسي و انتبهوا لا ترجونه علشان ما تطيش غازاته ..
نطله الضابط علي و خذته و قعدت اسوي خلطتي الخاصة حبوب سكر + حبوب جلطات + حبوب كيرم + حبوب شباب + ببسي ... يا الله يا براد بيت اشرب ... و شرب جدي المحلول النووي اللي بيخليه (جونقر) و شرب شوي و شوي و مات الشايب (معليش فيه خطأ في الخلطة) ... و فقدت الأمل بالنجاة و رحت اسلم نفسي و على طول كلبشوني و خذ يا تشويت (فيه واحد فلها و عطاني شلوطي) و خذ يا تصفيق و نطلوني بالسجن مع الدشير (تكفى يا العاقل) و اتهموني بقتل 14 شرطي و قتل مدني و التسبب بشلل مطحس ...
و خلوني بالسجن مع واحد عربجي من قلب ذابح 15 رجال و خاطف 15 حرمة و سارق 15 بنك .. الصراحة على هالخمس طعشات شكيت أنه يشجع الثنيان ..... و المجرم الثاني تخصص سرقة نعال من المساجد يقول انه سرق 461 زهاب و يفكر ان طلع من السجن يسجل اسمه في غينيس .... و المجرم الثالث كان يلبس عباة و مسوي دورية مع عجز حارتهم و كشفوه يوم حلفت عليه وحدة من العجز ان يقشم من الحب الي هي شارية ..... و الرابع مهرب مخدرات بطاقيته يقول انها مخيسة و ما توقعت أحد يفتشها ..... و الخامس سارق كتاب قراءة من مدرس رياضيات <وش يبي به .. مدري> ..... و السادس لابس صروال جنز و طقه ابوه (بس وش جابه؟!مدري) ......



بـــعـــد 3 شـــهـــور

جاء الحارس و قعد يحبرش في قفل باب السجن و قاموا كل المساجين و كلن ظف عفشه و حطه بشماغه من زود الثقة انه هو الي بيطلع .. بعدين ناداني العسكري و قال تعال يا جنط (جنط جابته أمك) جيت و قال لي : رح للضابط يبيك .. قلت له الي يبيـني يجيني .. قام تلني مع غالوقتي و وداني له .. و قال الضابط : من خلال التحقيقات المبدئية كان يبدو لنا انك انت الي ذبحت 14 شرطي و قتلت مدني و إصابة آخر ، لكن الي ثبت من خلال التحقيقات النهائية.....
هيه يبو !.!. اخلص علي بتطلعوني اطلع؟ والا بتحجزوني و ارجع (يلعن أم القصيدة يا شيخ) .. قال لا خلاص ثبت ان جدك الفاعل و طلع من السجن (ابوك يالواسطة) نظرا لأنه كان يعاني من متلازمة (البايسبوب) قلت و البايسبوب ذا وشو ؟ قال البايسبوب هذا هو عبارة عن تداخل أنزيمات البايسون مع هرمونات الحبوب ممثلة بالحموض المعدنية و أثناء هذا التداخل ينتج ما يسمى بالثلاموبيستا و الثلاموبيستا.......
قلت له:إيه طيب .. ان شاء الله .. طيب اطلع ولا ؟ قال: ان شاء الله تطلع .. قلت يعني بطلع ؟ قال إيه ..
وخذت اغراضي من على طاولته و قمت (كنت ماخذ راحتي عنده و امون عليه لدرجة اني شقيت ورقة أمس من التقويم) و طلعت من مكتب الضابط و جيت اطلع و يطبون علي العسكر و يمسكوني و يودوني للضابط و قالوا له يا حضرة الضابط ترانا احبطنا محاولة هرب هذا السجين (يا حبهم للشر) .. قال لي الضابط انت ما تستحي على وجهك ليه تنحاش ؟!
قلت له "" هماك قايل لي بنطلعك !! "" قال إيه بس خلنا نخلص إجراءات خروجك !! <-- خاف مني) قلت له و كم يبيلك عشان تخلصها انت و خشتك ؟!؟ <خربتها> قال خلاص يبو .. هذي ورقتك و وقعتها هالحين تقدر تطلع لكن بعدما تودع زملاك .. يا عسكري خذه لخوياه يودعهم ..
وداني لاخوياي (سابقا) و دخلت عليهم و قلت للعسكري خلك عند الباب و ان قلت لك افتح لي الباب افتحه بسرعة و صكه .. قال طيب ... و دخلت على المساجين و شفت واحد قوي مصفقني في أول يوم لي و قلت بنفسي خلني آخذ حقي .. ترا ما فيه احد احسن من احد و طبيت عليه و شوته لين قال آمين .. يوم جيت انحاش لقيت باب السجن مسكر و قمط وجهي قمطتن مهيب صاحيتون (الحارس قفل الباب و طلع تخبرون حارس حمار ما لقى يزغل الا هالوقت) .. و ما تشوف عينك الا عتاة الإجرام يطبون علي و يصفقوني لين جا حارس الغفلة مخلص مزغل و طب يفكهم عني و طقوه معي (خل المرجلة تنفعك) بعدين طب جيش كامل علشان يفكونا و انا معاد اشوف الا صراويل جيشية .. و طلعوني برا السجن و قالوا لي لعاد نشوفك مرة ثانية .. و طلعت للحياة (و وجهي مورم طبعاً) .. و رحت لبيتنا و لقيت ابوي ماسك اللي البرتقالي الشهير الذي طالما وسم بظهري و تحت ظهري بشبرين واقف عند الباب يحتريني يوم دخلت البيت طب علي مباشرة و بدون مقدمات ، و انا على نياتي احسبه بيسلم علي بعد غياب و طول انتظار قمت مديت يديني على جنب عشان استقبله بالأحضان بس جاني لسبة بنت ثلاثمية كلب و طب علي بكل شراسة و لعن أصلي و حاس مريري و استخدم جميع أنواع الفنون القتالية كالتكوندو و الكرتيه و كما لا تخفى عليكم مهارة ابوي بالكونغ فو (الجودو من مسؤليات عمي) و يقول انك مدشر جدك و مطيحه بالبايسون (بس علشان وده يطقني) و معلمه الإجرام و صرت أعاني من جروح نفسية من الدرجة السابعة بسبب فعايل براد بيت ..
لكن هيهات تحسبوني بقعد عند ذا الاهل لا قررت اهاجر وش اهاجر ذي مدري بس لازم اهاجر .. قلت يا ولد مالك الا المزاحمية .. و اضف عفشي و اروح للمزاحمية (يقالك مهاجر) و نزلت فيها و كل يومين اسير على اهلي (خوش هجرة) و للمعلومية ترى اهلي ما دروا اني مهاجر الا يوم علمتهم ..



من إنجازاتي :
1- أول من حط فاصلة (,) في موضوعه من بين أعضاء حارة المساطيل .
2- إلخ .......


تحياتي مجووودي

الخيال
06-10-06, 07:19 PM
المرة القادمة جرب مع جدك ريد بول


:0068: :0068: :0068: :0068: :0068:

مـيـشـو
06-15-06, 12:10 AM
مشكووووووور وماقصرت

ملك بكبريائي
06-15-06, 05:11 PM
اخوووي اخااف اجرب ريد بوول ويصير بااات مااان ههههههههههههههه