صدفه جتني طالعتني من بعيد اليا بعيد = من كثر ماهي تطالع قمت اطالعها واصد
ماوعيت الا برهبه كن نبضاتي تزيد = كنت اطالعها وخايف كنت اقرب وابتعد
قمت افكر واتذكر قمت اردد قمت اعيد =زاد خوفي ..وارتباكي خوفي لا يدري احد
الا هي .. قامت تنادي انت فيصل ؟؟ قلت اكيد = وانتي منهو جاوبت من دار ابوفيصل فهد
عانقتني ..واحضنتني ..وامسكت ايد بايد = ماعرفتك ..علميني ردت وقالت بعد
طالع بعيني وشوف في عيوني شي فريد = وين حبك ..وين وعدك... ان حبي للابد
ياخساره ايش صاير ليه كذا صاير بليد = وين ياحب السوالف والمحبه والعهد
لحظه .. لحظه اسمعيني مواخوك اسمه وليد = لا . ياحظي لا ياقلبي انا اخوي اسمه سعد
قمت اخربط في كلامي صار في قلبي وقيد = قمت اعدد انتي ساره ..والا نوره.. والاريم اوشهد
ياخساره كنت اظن اسمي مدون بالوريد = ماحسبت احساس قلبك يسكنه هذا العدد
ليه تخدعني؟ بحبك وانت لي كنت الوحيد = كنت اسافر في عيونك مايرافقني احد
كان يعجبني عنادك كنت اسميك العنيد = كنت احب اروع صفاتك يوم تعلنها ابد
كنت تاخذ من فؤادي كنت اجيلك بالمزيد = كنت تسبقني لقلبي يوم تصرخ ياوعد
كنت اصارع فيك حبي وانت حبك مايحيد = كنت اشوف الكون كله في عيونك لي بلد
كنت تاخذ من شعوري كل ماتبغى وتريد = كنت مدري تحتويني كنت اظنك لي سند
كنت غير الناس عندي كنت لي شيخ وسيد = اذكر اني كنت اسولف في غيابك حق سعد
واشتكي من طول بعدك وانت فيني موبعيد = ليتني ماقلت احبك ليت قلبي مانولد
ياكثر ماكنت احبك شوفتك لي يوم عيد = ياكثر ماصرت اكره نبض قلبي للابد
اسمعيني .. لوسمحتي واسمعي الراي السديد = من ثمان سنين كنتي في حياتي ياوعد
واذكراني كنت احبك واذكر اني كنت اشيد = في محبه ماذكر انه عاشها مثلي احد
ماختلفنا !! بس عودي لازمن امس البعيد = فيه كان الناس تخشى في العشق جزر ومد
كنت اشوفك في خيالي في حروفي والقصيد = رغم بعدك عن عيوني وبيننا حاجز وسد
رغم بعدك وابتعادك كنت احس اني سعيد = كنت اراضي فيك قلبي كنت اخف عنه واشد
كن حبي والمشاعر والاماني كالعبيد = نرتمي بحضان قلبك لين ماذاب الوعد
ياوعد الوقت عدى وصرت انا وانتي نعيد = عهد مدري كيف عدى المهم نفس العهد
تذكري وش كنت اسوي لانتهى عندي الرصيد = كنت اشوف الليل مظلم وارجع لعينك وارد
ارتمي في حضن همسك وابتدي لك من جديد = من كثر ماكنت اسولف كنت احس اني اسد
ياوعد.. شكلك تغير بعد هالعمر المديد = تدري اني من تركتك صار لي بنت وولد