السلام عليكم ورحمة الله وبركاته
صوتك اللي فيه نبرات الخيانة
كنت أحسبه لاقسى وقتي صفالي
كنت أجي له وأحتمي بعطفه وحنانه
وفي هجير الشمس عديّته ظلالي
كنت أذوق المر وأستحمل عشانه
كان آمالي وحلمي اللي بقالي
كنت أحسبه في الوفا عالي بنانه
وكان قدره في خفوقي حيل عالي
لين شفت الغدر في زلة لسانه
وانذبح قلبي وأنا أشوفه قبالي
جا يحسب إن الزمن باقي زمانه
ما درى إن ماعاد له بقلبي مجالي
جا يقول الأمر شوية خيانه !!!
"سامحيني وإنسي مافات وتعالي"!!!
قلت حدك لاتظن إنك ميانه
إرحل ولاتحلم بلحظة وصالي
لا تبرر موقفك كافي لعانه
طبعك اللي أرخصك في عين غالي
بنت وماأرضى في طبوعي الإستهانة
أعتزي بديني وغيره ماأبالي
لو تحب بصدق ماخنت الأمانه
ولو بصدرك قلب.. ماترضى العنا لي
قلبك اللي مات يحتاج لصيانة
ومن ظلام الوقت تحتاج انتشالي
تعلّمك الأيام من كانت فلانه
وإتعرف قدري وماتلقى بدالي
وإن قلبي مافي مثله في حنانه
وإن حبي صعب تلقى له مثالي
انتهينا...ماله بنفسي مكانه
وعن دروبه شد ياقلبي الّرحالي
ببتعد عن عالمه وأنسى كيانه
وإن لقيته شرق...أنا برحل شمالي
وإن تعبني الشوق واشتقت لزمانه
بذكر اللي صار كله في خيالي
وأذكر إني صنت له قلبي وخانه
وإني عانيت الألم طول الليالي
ربي أرجو رحمتك والإستعانة
وعن جميع الخلق تكفيني سؤالي
دفتر الذكرى...ونبرات الخيانة
هذا كل اللي بعد حبه بقالي