[خالد ((أبوعناد))...]

طـــاح الـــعــــتـــبـــ .........

السلام عليكم

جايب لكم اليوم قصيده اتمنى انها تعجبكم يارب


طاح العتب .. ما هيب لحية مشاريه
خل الكلام .. و حبل الأعذار طوّه
ما راح اقول أشلون .. او كيف .. او ليه ؟
ترى السؤال بدون أجابه مشوّه
العذر مااات .. و مات همه و رااعيه
و الجرح جف .. و جف غيمه و نوّه
صاحبك ضاع الهرج من بين أشافيه
ما كنّه اللي كان قبلك .. مفوّه
يجمع لك مِن الشعر فاخر معانيه
و يموت عندك قبل فيه ايتفوّه
ليه أنصدم ؟ و تخون قلبي هقاويه
و يطيح نجمي .. و أنخذل في علوّه
أصدق مع الواحد و احبه .. و اثاريه
طوول الليالي معتبرني عدوّه
لا يا بعدهم .. و أول الغيث تاليه
و أنت اتعرف قلبي .. و خيره و سوّه
يمكن لو انك قلت غلطان .. قلت أيه
مير البلا انك قلت .. ناقص مرّوه
قل لي متى شحيت في شي ٍ أعطيه
و قل لي متى صارت محبتك .. خوّه
يصعب على الرجال يثبت مباديه
و ان كانه اثبت .. كيف يثبت سموّه
الله يبيحك عن خطاك و تماديه
و يبيح قلبك عن خطاه و غلوّه
ما دام حبك خالطه شك .. ما ابيه
حب العتب و الشك .. ما اعيش جوّه
ما كنّي اللي كل ما تلمس ايديه
يغمرك بأحساس و حنان الأبوّه
و ما كني اللي كل ما مر طاريه
ضج الفضا باسمه .. و عكر هدوّه
يا مرحبا بالجرح .. و الله يحييه
لا صار من يمناك و الجرح توّه
بعض الجروح ان صابت القلب تنهيه
و بعض الجروح .. تزوّد القلب قوّه
الله كتب .. و القوس في كف باريه
و اللي تشوفه يا أبيض الوجه .. سوّه

المصدر: منتديات لمني بشوق - من قسم: (✿) وَزْن وَقَافِيْه