[أهواه والله أهواه]

مااااااجد وماااااجد وماااااجد الله يرحمه

لو بترك المجال وما اوقف كتابة كل ماكتبت عن مااااجد وربي ماراح أقف أبد ولا راح أوفيه حقه

يعني انساااان الفترة الحقيقيه اللي عشتها معه حوالي 4 شهووور استفدت فيها منه الكثير وعلقتني فيه قبل وبعد ماتركني

راح أبدأ من النهاااية وهي موته الله يرحمه وربي اني بكيته وللحين ابكيه كل ماذكرته وكل ماحصلي موقف وما لقيت احد اشكيله او اثق فيه (وهذا دايم يحصل) وكل مامريت مكانه بالحاره اللي كان يجلس فيه وكل وكل والله واجد اشيااااء تذكرني فيه حتى الكاااب اللي البسه كان يلبسه الحين كل مالبسته تذكرت ماااجد ماجد توفى في 3/10/1430 وماراح أنسى هالتاريخ مثل تاريخ ميلااادي يعني تاريخ ميلادي ولدت انسااان يحتوي كل المشاعر وتاريخ موت ماجد ولدت انسااان مجرد من الاحساااااس وبتاريخ ميلادي بعده باشهر بديت اردد ماما بابا وتاريخ موووت ماجد وللحين اردد ماجد ماجد (ليت تعود تشوف حالي بلياااك ..كنت اسمعك والحين همي سمعني) بتاريخ ميلادي ولد معي اطفااال واجد وبتاريخ موت مااااجد ولد فيني كثير مثل الهم والغم والبكاء اللي ماعرفته الا بعد موووته والحسره وانعدام الثقه بالناااس و..و...الخ وربي واجد لو بعدد انسى نفسي واكتب اللي محد كتبه

جاني الخبر وانا بعيد عن ديرته وماصدقت لاني واستغفر الله قد اتوقع الناس كلهم يمووتون بس ماااجد مايتركني لكن خاب ظني وماهو بكيفه والله لكن حكم القدر فرقنا وقسم بالله تمنيت اندفن جنبه لأني للحين مالقيت اللي يعوضني عنه بالتحديد الخبر جاني بالليل وقعدت شوي مع شباااب واتصلت على اللي بديرته كلهم وكلهم اكدوا الخبر ومعذلك ماصدقت ورحت ونمت ويوم قمت الصبااااح الساعه 10 والله ما انسى ذاك اليوم لقيت رساله من اخوووه يقووول ماجد توفى وراح نصلي عليه العصر هنا تاكدت 50 بالميه اني فارقته ومشيت بسرعه من مكااااني وكانوا اهلي معي بالسياره وكانت المسافه 200 كيلو لديرته وطول المسافه انا اسوق بس مدري عن الليء معي كنت طول الطريق أبكي واذكر ايااامه وكلامه وضحكته اللي ماتفارق وجهه اصلا وجهه طفووولي اللي يشوفه وده ياكله الله يرحمه المهم وصلنا ديرته وكملت بكاااي بالبيت وكان كل اهلي عندي يهدووووني وانا تقريبا كنت بحاله هستيريه يعني امسك امي واسالها هو صدق مااات وهي تبكي معي واسال جدتي وتبكي بعد كنت بس ابيهم يكذبووون الخبر لو يكذبووون المهم يوم اذن العصر رحت اصلي عليه ويوم شفته ممدد ومكفن تاكدت يقينا اني خلاص ماراح اشوفه بالدنيا ودفنته وانا كلي اسى بس حااابس دموووعي لين اطلع من المقبره ويوم طلعت مشيت بالسياااره مدري وين اروووح وكتبت القصيده بنفس الوقت مع البكاء والتذكر الله يرحمه واللي شد انتباهي بالمقبره وحنا ندفنه حتى اللي كانوا يزعجوونه بحياته واللي متمشكل معاهم جايين يصلون عليه ويقبرووونه فلله دره من شاااااب

والله مقدر أكمل انشاء الله بكمل بوقت ثاااني

والحين عاد بحط احدى مرثياااتي بماااجد واسمحووولي لان عندي دوااام والوقت متاخر

حان الرحيل وودع القلب غاليه ... وأقفوبه العالم وهلن الأعيان
راح العزيز اللي ملا كل نواحيه ... راح ودموع العين تجري جرايان
كل ماتذكر جلسته ثم حكاويه ... وان جيتله زعلان عودت فرحان
وكل ماتذكر لا كشفلي خوافيه ... فضفضلي الخافي ولاشال الأحزان
وان جيتله مهموم والهم مخفيه ... ارجع وأنا مبسوط وأضحك بالاسنان
وغيره كثير وخايف إني أطريه ... واحتاج دمع العين وأهل وأنهان
كل ماتذكر هالسوالف وأناديه ... ماسمع ردود اللي غدا يلبس أكفان
وين أنت ياللي دوم بالخير نطريه ... من غيبتك ياخوك همي ترا بان
من غيبتك قلبي غدا الحزن ماليه ... وأصبحت كل الوقت سارح بالأذهان
مابين أصدق هالخبر والا أخليه ... والموت حق وخالق الناس رحمان
الموت ياخذ كل غالي ومغليه ... ولا كل طايل بالعمر قال كسبان
أحدن يعيش سنين والله يبقيه ... ويختم له الله شارب السم سكران
وأحدن مع العشره ثمان وتكفيه ... ويموت في مسجد قرا فيه قرآن
والا أنت ياماجد فتى مانساويه ... ندعيلك الله جاعل الموت برهان
يالله يالمعبود طالبك تسقيه ... من بارد الما تسقي اليوم ظميان
وتوسع بقبره ويارب ترضيه ... وتغفرله الماضي ولو كان غلطان
وتعظم أجر أم تبى شوف عينيه ... وألهم هم اللهم صبر وسلوان
واللي تعب ربى وزود دعاويه ... يارب عوض والده طيب وإيمان
ماجد فقيده وانفقد من معاديه ... ماقد غلط لكن ظليمه وعدوان
والله لو ابكي ويرجع برجليه ... لابكي الين أطيح ياناس غشيان
وأصحى وأصيح بعالي الصوت وأدعيه ... ماجد وقلبي عقبكم سد بيبان
لكن دعيت اللي ترا دوم نرجيه ... يرحم سجين ماله اليوم سجان
وهذي من حقوقه علي ليتي أوفيه ... شي بسيط وليتله فيه ميزان
هاض الخفوق وبين اليوم مافيه ... لحظة وداع إنسان وأظنه إنسان
شكله بشر لكن وصوفه تحليه ... ماقوى على وصفه ولو دجت الأكوان
لكن بتوفيق الولي جت قوافيه ... واختم بها ماجد لها دوم عنوان
وصلوا على المختار والقاف أبنهيه ... ولو مت ياماجد لك فداخلي شان
يوم 4/10/1430 يوم دفن ماااجد الله يرحمة رحمة واسعه

وقد انشدت بصوت احد اصحااابي

والحين عن اذنكم