[قشطه بالعسل...]

الجـــزء الخـــامس

************************************

.
.
.



الممرضة اللي جتهم البيت مع الاسعاف كانت طمنتهم ان محمد نبضه و ضغطه وتنفسه طبيعي ...
سألتهم عن الطيحة كيف صارت طبعاً ماحد كان عارف .. ونقلوه المستشفى علشان يسوون له الاسعافات اللازمة ... وصلوا المستشفى .. و دخلوا محمد للطواريء .. الطبيب فحصه .. و طلب أشعه لجميع جسمه عشان لو كان فيه كسور
أو رضوض وخلافه... و طلب بعد تحاليل مختلفة .. سأل أم محمد لو كان محمد يعاني من أي مرض زي سكر أو فقر دم .. لأنه رجح إن طيحته ماكانت بسبب انه مجرد زلق بالحمام ... وإنه احتمال كبير يكون اغمى عليه وهو واقف
وطاح لهالسبب .... جاوبت أم محمد انه محمد مايعاني من أي مرض ..
طلب الدكتور من الممرضة عمل نقل دم فوري له لأن كمية اللي نزفها كانت كبيرة حسب كلامهم .... و عمل الأشعة والتحاليل ... كانو متخوفين من إن الطيحة أثرت على الدماغ .... وبعد وقت انتظار.. ماكان طويل بالواقع لكن
على أهل محمد كان طويل وطويل جداً .. طمنهم الدكتور إن محمد مصاب بكسر سطحي بيسار رأسه
في عظام الجمجمة .. وكسر بمفصل يده اليسار لأن الطيحة كانت عليها ... كانوا أم نورة وعبدالله ونورة عند محمد بسريره في الطواريء .. ولضيق المكان وزحمة الناس كانو فهد ومها ومشاعل في الانتظار وكل وقت والثاني
يجي واحد منهم يشوف وضع محمد .... بعد وقت قصير ... جا الدكتور وبيده أوراق فحوصات محمد ... قال لهم ان محمد بيستمر غايب عن الوعي على الأقل 24 ساعة ... سأل عن والد محمد وقلوله انه مسافر ... طلب أمه تجي معاه للعيادة لأن فيه أمر مهم لازم يطلعها عليه ... بالعيادة .. سألها الدكتور لو لاحظت على محمد أي تغير بالفترة الأخيرة ...
قالت له إنه وزنه نزل شوي .. وفقد شهيته للاكل .. و رجحت هذا لنزلة البرد للي صابته مؤخراً .. سألها كيف عرفت
انه اللي معاه كانت نزلة برد .. وعزت هالشي للأعراض اللي صابته .. من حرارة وألم عظام وغيرها ... سألها عن شوية تفاصيل زيادة .. و قال لها : أم محمد الكلام اللي باقوله لك الحين مجرد تشخيص مبدأي نسبة صحته نفس نسبة الخطأ فيه .. بناخذ تحاليل زيادة لمحمد وبكرا ان شاء الله بنفيدكم لو كان التشخيص صحيح ..
أم محمد المسكينه كانت تداري خوفها : خير يادكتور .. !!!!
- خير ان شاء الله يا أم محمد .. التحاليل المبدئية اللي أخذناها بينت لنا احتمال اصابة محمد باللوكيميا .... و الأعراض اللي ذكرتيها لي من أعراضها .. لكن مو على كل حال يكون التشخيص الأولي صحيح ...
- سرطان الدم !!
- بالضبط .. لكن يظل مجرد نتائج أولية ... و اللوكيميا لها أنواع كثيرة ومختلفة
- سرطان الدم ماله علاج يا دكتور .. يعني لو طلع التشخيص صحيح بتكون نهاية محمد قربت ..!!
- أم محمد أولاً انتي مره كبيرة ومؤمنة بالله إن شاء الله وتعرفين إن الأعمار بيد الله .. يمكن أنا اللي قدامك الطبيب
اللي أعالج الناس تنتهي حياتي بعد لحظات .. ومحمد لو أراد الله أخذ روحه بياخذها سواء فيه سرطان دم أو مافيه .. مشيئة الله تفوق كل شي.. و وكثير مرضى لوكيميا تعالجوا وواصلوا حياتهم الطبيعية .. ...
مانبي نستبق الأمور ..وحتى لو كانت التحاليل الأولية صحيحة ... اكتشاف المرض في بدايته بيساعدنا كثير
في العلاج ...قولي الحمدالله على كل حال يا أم محمد .... اصابته بهالمرض أهون من ان انه يروح بحادث ...
أو يفقد حياته بسكته ... لو تشوفين الحالاات اللي تجينا يومياً بصدق تحمدين ربك و تحسين انه لو كان محمد مصاب بلوكيميا فهالأمر يهون عند أمراض ثانية كثيرة ... ومدام فيه أمل بالعلاج مافيه على الله صعب .. الحين أبي موافقتك على بعض التحاليل .. وبكره الصباح ان شاء الله بنتأكد لو كان اشتباهنا بالحالة صحيح أو خاطئ ..

وقعت ام محمد على الموافقة ..... و رجعت للمكان اللي كان فيه محمد بالطواريء.. لقتهم نقلوه لغرفة ثانية بجناح داخلي لأنه يحتاج تنويم ...
بطريقها للغرفة بدت تفكر بأشياء كثيرة .. من ضمنها كيف بتنقل لعيالها وابوهم الخبر .. ولو صار محمد فعلا مريض باللوكيميا وش بيصير فيها .. كان ترديدها لإسم الله بكل لحظه مطمئنها ومنزل السكينه على قلبها ... هي نفسها استغربت من هالهدوء اللي هي فيه .... وكانت تتذكر كلام الدكتور ان اكتشاف الحاله فبدايتها يساعد كثير .. وحمدت الله لأن طيحته على ضررها الا إنها كانت مثل رحمة من الله لأنها خلتهم يعرفون بدري لو كان التشخيص صحيح ..
دخلت أم محمد الغرفة ... و كانوا كل عيالها وبناتها مجتمعين حول سرير محمد .. نظراتهم كلهم اتجهت نحوها ..
كانوا ساكتين بس عيون كل واحد منهم كان تنطق آلاف الأسئلة .... وجه أم محمد ما كان يبشر بخير الشي اللي خلا عيالها يتهيبون السؤال .... وهي ماكانت عارفة وشلون تقول لهم ....
استمر السكوت دقايق معدودة .. بعدها كسر عبدالله هالصمت بسؤاله : يمه وش قال لك الدكتور ؟؟
يمكن كانت بحاجة هالسؤال عشان تبدا بالكلام ..لأنها فعلاً ما كانت لاقية بداية تبدا منها .... وعبدالله بسؤالة حط بداية السطر اللي كان لازم تكمل منه .... ماراح تكذب عليهم ... لازم تهيئهم لقبول الموضوع زي ما سوا معها الدكتور ...
لو طلع الكلام صح يكونون عارفين على الأقل انه كان فيه احتمال .. ولو طلع التشخيص غلط بيكون الخبر كأنه ماكان .. وبيصير مجرد تشخيص خاطئ .. مازالت عيونهم تترقب الإجابه .. نظراتهم كانت مليانه علامات استفهام ....
- الدكتور قال........................... وبدت تحكيلهم عن اللي قال لها الدكتور زي ماقاله لها بالضبط .. بدون زيادة أو نقصان ... انتهت ام محمد من الكلام ... و ردود فعل تفاوت بين عدم تصديق وحزن وقلق وألم وخوف .. عبدالله ساكت .. وجهه ماكان يعكس أي مشاعر أو ردة فعل.... مشاعل ونورة يبكون .. فهد ما كان فاهم بالضبط وش اللي بيحصل
ولا هو مدرك حجم الخطر اللي بتتعرض له حياة أخوه ... يعرف انه مريض بس كيف و ليش .. صعب على طفل بسنه يستوعب هالأمر بسهولة ... أما مها أصرت ان ابوها يدري بالموضوع ... وافقتها أم محمد بالرأي وطلبت منها انها تتصل فيه ...
و تبلغه باللي صار لمحمد و بالكلام اللي قاله الدكتور ...
على كلمتها .. طق باب الغرفة .. قام عبدالله يشوف من بالباب .. طلب من البنات يتغطون ... و دخلت خالتهم منيرة ............ وراها عبدالعزيز ولدها ...... نورة شهقت بصوت خلا الكل يلتفون لها ....

.................................................. .........
...............................