[قشطه بالعسل...]

الجــــزء الســـابـع

***************************
.
.
.
محمد استمر بالمستشفى ....
بدا بتلقي جلسات العلاج الكيميائي .... أبوه ترك عمله وفضل يظل بجانب ولده بهالفترة الحرجة اللي يمر فيها ....
أبو محمد برغم قسوته وندرة ابداءه لمشاعره و تصرفاته القاسية تجاه عياله ..
الا ان وضعه مع محمد كان مختلف .... يمكن لشعوره بأنه المسئول عن حالته اللي وصل لها ...
رغم رفضه التام للاعتراف بانه هو السبب ..
وهذي محاولات لتكفير غلطة كلفت محمد سنين من عمره ...


ما كان فيه جديد بهالفتره ... من جلسه للثانيه ... والكيماوي يحقن بوريد محمد ... وهو يحس كأنهم يحقنون النار بدمه
من حرقة مايجيه.... والآلام اللي تلحقه من آثار العلاج كانت تبكّي والدته قبل تبكيه .. تحس ان المرض بدمها مو بدمه .. ياما سهرت ليالي وهي تكمّد رجوله المتورمه من آثار العلاج .... تطبطب عليه .. تلهيه عن أوجاعه..
وتمسح دموعه بعد يوم او يومين من كل جلسه اذا بدا الألم ينهش عظامه ومفاصله ...
يمكن لو المرض فيها ما تألمت لهالدرجة ..... ومن يلومها ..!!! ياقلب الأم .......!!!

وجود عبدالعزيز بحياة نوره كان مثل نسمة ربيع باردة بيوم صيف حار ... تهب على غير عادتها وتنعش قلب مرتجيها ... وتنحي تعب قلبه و كدر خاطره .... وتحمل معها لمسة حنان بأوراق ورد تمسح عرق جبينه .. تكفكف دمعته ..
و تذوقه حلاوة بسمه تنسيه مرارة همه ....
علاقتهم استمرت مع انها كانت محاطه بهالة حزن بسبب وضع محمد .. وكانت نوره تلاقي عبدالعزيز
بين وقت و الثاني بالمستشفى .... في حالة عدم وجود أبو نورة طبعاً وبدون مايدري ...
حتى أم عبدالعزيز ماكانت تقدر تجي و ابو محمد موجود ..... وقرب موعد سفر عبدالعزيز كان يشكل هاجس لنورة ... الحين ماعادت الطفله اللي تبيه يلعب معها .... صار عبدالعزيز الحين جزء منها ... و شخص ضروري بحياتها تتنفسه
مع الهوا ... غيابه كان بيخلق فراغ وفراغ كبير بحياتها .... بس هي ما كانت تبي توقف بطريق مستقبله ..
ولا كانت تحاول تفتح الموضوع معه أو تبين له انها متضايقة من هالشي .... ولو انه أكيد يحس فيه ..
ومتضايق منه هو بعد ....

شهر تقريباً مر على هالحال .. حالة محمد شبه مستقره ... و العائلة رجعت تمارس بعض حياتها بصورة طبيعية ...
سفر عبدالعزيز بيكون بعد ثلاث اسابيع بالضبط من هاليوم ... كان وقت عصر ونورة تجهز ملابس لمحمد بتاخذهم معها للمستشفى ... دخل عليها ابوها الغرفه .. وجلس على طرف السرير....
- هلا يبه .
- وش تسوين ؟؟؟ كنت أدور عليك بغرفتك ...
- اجمع اغراض لمحمد باخذهم معي المستشفى ....
- اها ... طيب خلي اللي بيدك وتعالي أبيك شوي ....
- ان شاء الله ..
تركت نورة الأغراض وأخذت محلها جنب ابوها .....
- عمك صالح كلمني اليوم ....
- ............................!!!
- وهو كان مكلمني من فترة شهر ونص تقريباً ... لكن سفري أول شي بعدين مرض محمد ماخلالي وقت أقولك ...
- عن وشو ؟؟؟؟؟
- خطبك لولده ...
- بس تركي خاطب مها !!!
- مو تركي ... ناصر ...
- السكّير هذاك .........!!!
- الولد تاب من زمان ... ويقولون انه التزم .. وبطل سوالفه الأولى ....
- وين التزم وهو سيرته على كل لسان ...!!
- عيب يابنت ذا يبي يصير زوجك ....
- يخسي الا هو يصير زوجي ... وأصلا من قال لك اني ابي اتزوج الحين ..!!! قلهم اني رفضت.....
- هو بكيفك !! أنا جاي أعلمك موب أشاورك .....عشان تجهزين نفسك
- ومحمد !!! وشلون تبي تسوي عرس وولدك بالمستشفى يتعالج من سرطان وبين حياة وموت !!
- قلنا ملكه !!! ومحمد حالته مستقره ... الزواج بعد مايقوم بالسلامه ..
- على فكره خالك ابو فيصل كلمني بعد وانا مسافر قبل مرض محمد .. يبيك لفيصل ولده .....
و قلت له انك مخطوبه لولد عمك ...
- يبه من جدك انت تتكلم !!!!
- هالأمور مافيها مزح .. ملكتكم انتي ومها بليله وحده ان شاء الله...
- وش اللي ان شاء الله !!! لا !! مستحيل أوافق !! مو بكيفك !!! حطمت حياة محمد وبتحطم حياتي أنا بعد !!!
ما راح اسمح لك !!
((كفّ من يد أبوها خلى نوره تسكت ... صرخ فيها ...))
- الملكه بعد اسبوعين من اليوم .... والكلام بهالموضوع منتهي ... أي نقاش فيه ما راح يكون بصالحك ...
لو امك مربيتك زين مارفعتي صوتك بوجه ابوك .. تفووو عليك وعلى أمك لا بوكم لا بو من عاشركم ..........!!
طلع من الغرفة و ضرب بالباب وراه بأقوى قوته... نوره ظلت مكانها .... الغريب ان ولا دمعة نزلت من عينها ...
قامت تحاكي نفسها ..
( وش دخل أمي الحين ...!!!! معقوله هذا أبو !! ماعنده مشاعر !! ما يحس!! محمد بالمستشفى وهذا يبي يسوي ملكة !! وعلى مين ! ناصر .... راعي الخمر والسكر والبلاوي !!! لهالدرجه أنا رخيصة بعيونه !!! وين قلب الأبو !!
لو قلبه حجر ما كان يسوي هاللي بيسويه !!!! ولده يصارع الموت ويفكر بزواج !!! حتى فرحتنا بيقتلها !!!!!
و عبدالعزيز !!! أنا حالفه ما أكون لغيره !!! كنا خايفين من فيصل وطلع ناصر !!!! عبدالعزيز .. لازم اكلمه الحين
و أقول له باللي صار .... والا ... والا... لأ .. مابي اضيق صدره و أكسر قلبه ... باحل الموضوع لحالي ....
باداوي علتي بإيدي .... وهالأبو ..!!! يذبحني ولا أنفذ اللي يبيه !!! وهالعم ّ ما يطلع الا اذا بغى شي ...!!
محمد بالمستشفى من شهر مافكر يطل عليه خمس دقايق يقول حمداللله على سلامته ... وبكل وقاحه يتصل يخطب ..!!!
موب كافي عليه مها المسكينه لها سنتين مخطوبه و خطيبها ما يدري عنها ..!!
الشرهه مو عليهم على الأبو اللي مطاوعهم و مرخص بناته ..!!
لكن هيّن يا ناصر .. وانت ياعمي .. وانت يبه ....
والله ما يحصل لكم اللي تبون .. أي زوج غير عبدالعزيز حرام عليّ إلى يوم الدين !!!!! )

.................................................. ..........
............................