[قشطه بالعسل...]

الجـــزء الثـــامن

*****************************
.
.
.


بقاء ابو نورة بالرياض جنب محمد ما كان مجرد رحمة وشفقة بالولد زي ما كان الكل متصورين ...
هذا سبب،، بس الأكيد انه ما كان السبب الوحيد ... ابو نورة خسر معظم فلوسه بعد ما غشه شريكه بالشركة الهندسية اللي أسسوها سوا .. غلطة ابو نورة تفويض شريكه بكل الصفقات تقريباً .. بينما هو كان متولي العمل الإداري ..
كان هالشريك يحول معظم الربح لحسابه الخاص و الباقي القليل يحطه بحساب الشركة .. وبقى على هالحال
لحد ما قربت الشركة تعلن إفلاسها .. و ضاعت فلوسه ...
أبو نورة كان متدين 40 % تقريباً من رأس مال هالشركة من العم ابو ناصر .... و المبلغ كان كبير و صعب يرده ..
فكر بطريقة تحل أزمته ما لقى الا انه يعرض على ابو ناصر زواج ناصر من نورة .. و أقنعه ان ولده ناصر كبير
و سمعته سيئه ومحتاج وحده تكتم عليه و تحاول تصلحه وان ما قدرت تستر عليه ... ولو تزوج ممكن يحس بالمسئولية ويبطل خرابيطه .. وان نوره بنت عمه الوحيد هي أصلح من يقوم بهالدور .. وانه بيتنازل عن جزء من مهر مها
و مهر نوره مقابل هالزواج. . والعم وافق ... هالكلام تم قبل مرض محمد .. و مرض محمد أشغل الأبو شوي ..
لكن العم رجع أثار الموضوع و طلب من أبو نورة الاستعجال .. يعني الزواج اللي خططوا له ابو نوره وعمها ابو ناصر بين ناصر و نورة و الاستعجال بزواج مها و تركي....
بالواقع ما كان الا مقايضة على البنات مقابل تنازل العم عن المبلغ ... و صفقة .. صفقة تجارية بصورة زواج ...
فيها عقد وشهود وبايع ومشتري ... صفقة رسمية بس البضاعة فيها انسان .... عبودية المال اعمت عيون الأبو
وخلته يبيع بناته بثمن بخس ... بوصخ دنيا ... بولا شي ..!!!

ما أحد كان عارف بهالصفقة الا العم وأبو نوره .... كانت المسأله شكلياً زواج رسمي ... وخطبة العم للبنت من ابوها .........

بعدها بكم يوم عبدالعزيز كان بدا يستعد لأمور سفرته ... بنفس مكسوره لفراق بلاده .. أهله ... ونوره ....
وهالأخيره كان فراقها هو اللي فاطر قلبه .... خطته وهو راجع الرياض كان يتقدم لها قبل يسافر
ويخطبها من ابوها علشان يضمن مستقبله معها .. كان يحلم باليوم اللي تصير فيه زوجته ورفيقة دربه و أم عياله ..
بس للأسف ما كان قادر يتقدم لها ....... خوفه من ردة فعل ابوها خاصة مع حالة محمد كان يمنعه ....
تمنى لو اخذ هالخطوه من زمان ... أول ما رجع .. أو على الأقل أول ما اعترف لها بحبه .......

كان عبدالعزيز بالسفاره الأمريكية يخلص بعض اجراءات السفر ... سمع صوت يناديه من بعيد ...
- عبدالعزيز .. عبدالعزيز
التفت عبدالعزيز يدور مصدر هالصوت ما لقاه .. اعتقد انه يتوهم .. او يمكن ينادون شخص غيره بالمكان ..
حس بيد مسكت كتفه ... التفت .. لقاه شاب .. بعمره تقريباً ...
- عبدالعزيز ؟
- ؟؟؟؟؟؟
- ما عرفتني ؟؟
- لا والله يا اخوي..؟؟ ما عرفتك ؟؟
- أفاااااا .. نسيت أيام الثانوي ... !! من اللي كنت تغش منه دايم ..!!
- سعد الدافور ؟؟
- ههههههههههه ايه الدافور
- هلاااااا .. هههههههه .. اعذرني قسم بالله اني ياشيخ فاقد الذاكره .. الا وين نظاراتك ام فناجيل ..
هي اللي كنت اعرفك فيها ...
- هههههههههههه خبرك عتيق تطورنا و أنا اخوك .. سويت عملية ليزك وارتحت منها الحمدلله.... ...
وانت هذا انت نفس عزوز الاول ما تغيرت .. عرفتك من أول ما شفتك .. يووه خمس سنين مرت من يصدق !!
ياسرع هالدنيا .. تشغل الواحد حتى عن نفسه وتسرق الوقت منه سرق ...
وش الدنيا بك ؟
وش علومك؟؟ وش اخبار دراستك ؟؟
- أبد .. مالقيت جامعه تقبلني هنا و سافرت من ثلاث سنين لمينيسوتا ادرس حاسب.... وجيت اجازه من فتره ..
وهذاني جاي اخلص أوراق بارجع اكمل دراستي ............ و أنت بشر عنك عسى الأمور طيبه ..
عاد دافور ماينخاف عليك ؟؟
- أييييي دافور يا رجال ... الله يذكر ذيك الأيام بالخير ... ياليتها تنعاد على الأقل الواحد يدري وش هو عليه ...
ياطويل العمر تخرجت من حوالي السنه تخصص محاسبة بتقدير ممتاز مع مرتبة الشرف ...
قعدت عشر شهور أحوس على وظيفه ... و لقيت اعلان عن وظيفة خارج الرياض .. و أطير لها ..
ولو ان راتبها ما يسوى عنوتها .. بس قلنا نشتغل لين ربي يرزقنا وظيفه حكومية ... وماااش الحظ النحس ما يفك عنا .. اشتغلت فيها شهر ونص .. وواحد من الشركاء نهب خويه وهج بالفلوس ..والمسكين يقولون نص راس ماله دين من اخوه ... الله يعوضه .. و أنا .. رجعت عاطل ... و انشغلت بمرض الوالده الله يشفيها وهذاني جاي اكمل اجراءات سفرها للعلاج ...
- سلامتها ما تشوف شر ..
- الله يسلمك .. الا تعال .. اخبر ايام الثانوي كنا نشوف معك بالحاره احيانا ولد يقاله محمد الـ.... يصير لك هو ؟؟
- ايه ولد خالتي الله يقومه بالسلامه ..
- سلامته وش فيه ؟؟
- لوكيميا ..
- لاحول ولا قوة الا بالله .. الله يشفيه ويعافيه ..
- آمين .. بس ... وش جابه على بالك الحين ؟؟
- تذكرت اسم عايلته انه نفس اسم عايلة راعي شركتنا اللي فلّس ..
- وش اسم راعي الشركه ؟؟؟؟؟؟؟
- عبدالرحمن الـ.........
- عبدلرحمن محمد الـ ....... ؟؟
- ايه .... لا يكون تعرفه ؟؟
- هاه ... لا .. الا أقصد ايه.. من بعيد ......
أأ.. عن اذنك سعد تذكرت موعد مهم لازم اروح له .. اشوفك على خير ...

ومشى عبدالعزيز بدون ما ينتظر حتى توديع سعد .... و سعد كان يناديه
- طيب ... عبدالعزيز ... شلون تشوفني؟؟ عبد العزيز .. رقم الجو... ا...ل ... وش هالموعد اللي خلاه يطير ..!!
عبدالعزيز تظاهر انه ما كان يسمع شي .... حاول يخلص اوراقه بسرعه ويطلع بعيد عن نظر خويه ....

وبطريقه للبيت كلم نوره ... و حكالها سالفة شركة ابوها .... و الدين اللي عليه من عمها .. و سألها لو كان جاب لهم سيره للموضوع .. نورة نفت هالشي .. و بدت تفهم سبب اصرار ابوها على الزواج من ولد عمها ....
نوره بالواقع كانت قدام مشكلتين ..... الأولى اقناع ابوها برفض الزواج من ولد عمها ...
والثانيه اقناعه بالموافقة على عبدالعزيز ومحاولة تلميع صورته اذا تقدم ... مع ان عبدالعزيز ما قد جاب لها سيرة خطبه الا مره وحده بس .. يوم يعترف لها بحبه ... و هالشي كانت نوره مستغربه ... بس اخره مرض محمد وانشغالهم فيه ...

نوره دورت ابوها بالبيت على امل تلقاه .. لأن مو من عوايده يجلس ببيتهم الا وقت النوم بس .... وعلى غير عادته من حظها لقته كان بيطلع ..
- يبه ... يبه ..
- خير ؟؟
- يبه .. بـ أأأ .. باكلمك بموضوع ......
- قلت لك مسألة زواجك من ناصر منتهية ومافيها نقاش !!!
- موب عن سالفة ناصر ..
- أجل عن وشو ؟؟
- تعال اقعد و أنا أقولك ....

جلس ابوها و كان يتسائل بنفسه وش هالموضوع اللي بتكلمه فيه نوره ... ما كان بينهم ذيك الألفه اللي
بين الأب و بنته ..نادر ما كانوا يتكلمون بمواضيع .. نادر لدرجه انه يستغرب طلب بنته انها تكلمه ....
- يبه خسرت شركتك ؟؟؟؟
- و انتي وش دخلك ؟؟ ومن اللي قالك أصلاً ؟؟؟؟
- وحده من صديقاتي قالت لي ان .. اخوها صديقه موظف كان يشتغل عندكم ...
- خسرت والا ما خسرت وش الموضوع .. ترى ما عندي وقت عشان أضيعه معك ..!!
- تعرف عبدالعزيز ؟؟
- من عبدالعزيز ؟؟
- ولد خالتي منيرة ؟؟
- ايه وش فيه ..!!!
- يقول انه مستعد يدخل معك شريك بالشركه ...
- من وين له فلوس ذا توه يدرس ..!! بعدين تعالي هنا .. وش عرفك انه عبدالعزيز يبي يشاركني ..!!
ووش عرفه اني خسرت ؟؟
- فلوسه من ابوه .. واللي قالت لي عبير .. و هي اللي قالت له عن الشركه لأن صديقتي اللي قالت لي تصير صديقتها هي بعد ..
- اها ...
- يعني موافق ؟؟
- يخسي الا هو ولد صويلح اشاركه .... أكيد ولده بيطلع مثله ...
- لا يبه .. صدقني عبدالعزيز غير ..
- اللي بافهمه ... ليش من بد العالم يبي يجي يشاركني انا .. أكيد ابوه وازه علي ..
- لالا .. ابوه مايدري ... هو يبي يشاركك عشان .....
- عشان وشو ؟؟؟
- يبي .... يخطبني ...
- اييييه قولي كذا من الأول .. يعني مهوب لله .. لأ وستين لأ .. زواجك بيتم على ناصر . ولو مايبقى من الرجال
الا عبدالعزيز ولد صويلح ما زوجته ...
نوره وهي تبكي : - يبه عشاني.. يبه حلفتك بالله ترحمني ..ما ابي اتزوج ناصر .. مابي .. مابي ...
- دلع بنات .. وبعدين تبي تتعودين عليه بعد الزواج ... انتي ما عاشرتيه اذا عاشرتيه بتتغيرين ...

نوره ببكا اعلا و ودموع من قلبها : - يبه مابيه .. ما احبه .. انا أحب عبدالعزيز ولاني متزوجه غيره ...
ابو نوره كأن عيونه طلعت من مكانها من الغضب الي تنطقه... تناول عقاله من على راسه .. وبدا يضرب فيه نوره .. ضربها فيه ضرب كفار .. وهي تتأوه وتبكي و تصرخ :
- موتني .. سو فيني اللي تبي ... بس زواج ماراح اتزوج.. ماراح اخذ الا عبدالعزيز ..
ويوم حس انها بدت تنهار بين يدينه .. رفسها برجله ..
- زواج من غير ناصر مافيه .... سمعتي .... و اياني و اياك اسمعك تجيبين سيرة عبدالعزيز على لسانك مره ثانية ... وطلعة من البيت مافيه .. حتى لمحمد بالمستشفى .. كنت عارف ان اهل امك ما يجي منهم خير ...
خليك تخالفين كلامي يانوره .. هاللي جاك ولا شي من اللي باسويه فيك لو تخالفين كلامي ...

و تركها المسكينه تتألم من أوجاع قلبها قبل جسمها ... الكدمات اللي انتشرت فوق جلدها ولا شي عند كدمات روحها .... تبكي بحرقه ... وتحس بقلبها نيران تشتعل وتتزايد ..... و كن ضرب ابوها كان حطب يغذي غضبها
و يعزز قوة تحديه بداخلها ...

مرت الأيام و نوره هد التفكير حيلها و اتعب نفسيتها ... انقطعت عن عبدالعزيز اللي كان ميت خوف عليها
و ماكان قادر يوصلها ... كان يسأل أمه عن أخبار خالته و عيالها وتطمنه انهم بخير ... وهو ما كان مرتاح ..
شلون بخير و هو له أكثر من اسبوع ما سمع صوت نوره ...
نوره ما قدرت تلاقي حل تتخلص فيه من هالحكم الظالم اللي حكمه عليها أبوها ... كانت تحس بعجز كبير ... و مافي أقسى من شعور العجز .. تحس انك مرمي بصحرا خاليه .. ممتده أطرافها ... الرمل يحيط فيك من كل الجهات ..
وقدامك واحة ماء ما تقدر توصلها .. لأنهم مكتفين ايدينك ورجولك بسلاسل من حديد وحاكمين اقفالها ..
سلاسل مثبته بعمود مغروس بوسط هالصحراء .. وانت تدور حوله بحركة صعبة .. ومع كل حركة تجرحك هالسلاسل وتدميك .. تحاول تتخلص منه .. ماتقدر .. تحاول تقرب لهالماء بتشرب .. ماتقدر .. تصرخ بملي صوتك ..
تبي أحد يسمعك وينقذك من هاللي انت فيه .. و بخيبة أمل يرد عليك صدى صوتك تعبان منكسر ...
بينك وبين الموت خطوات .... تعبان .. ظميان .. هلكان ... تبكي بضعف وانكسار .. وتحس بالعجز وقلة الحيله تكتم على أنفاسك... و تهب ريحها تطفي شموع الأمل في صدرك وحده ورى الثانيه .. ولا يبقالك غير شمعه وحده هي ربك ترتجيه يفرج كربتك ويغيثك برحمته ... وهذا كان أمل نوره اللي كانت تعززه بدعواتها صبح وليل .. رحمة ربها ....
وماكانت قادره تكلم عبدالعزيز .. لأن صوتها بيوصله مجروح .. ولا راح تقدر تخدعه زي أول و تقول له انها متضايقه عشان محمد .. بتفضحها نبرة الهم وبتخنقها عبرتها ... و وش تقوله .. ان ملكتها قربت .. ! مستحيل تعطيه السم بإيدها وتقوله اشرب ...

جا اليوم الموعود .. يوم تنفيذ الحكم ....يوم الملكه .... كان يوم خميس .... نوره ما نامت ليلتها .. أو بالأحرى اضافت ليله لباقي ليالي الأرق الماضيه اللي قضتها ..... طل الصبح وصوت عصفوره على شباك نوره .....
نوره بدت تحاكيها بنفسها وتقول لها : يا ليتني زيك ... حرّه ... أطير بلا قيد أو حد ... بجناحاتي أوصل أعلى السما
و ومتى مامليت من سماي نزلت اتفقد هالأرض .. واذا ماعجبني شي فيها أهرب للسما.. ياليتني أملك جنحان أطير فيها و أهرب من هاللي أنا فيه .... أهرب .. !!
بدت نوره تردد هالعباره بنفسها .... ما قدامي خيار الا اني اهرب .. لازم أهرب .. لازم ..!!

- عبدالعزيز ..
- هلا نوره .. وينك يابنت الحلال ؟؟ ماتردين على جوال ولا عاد تجين المستشفى .. ميت قلق عليك و ..
- عبدالعزيز مافيه وقت .. تعال بيتنا بسرعه ..
- وش ؟؟ ليش ؟؟ وش فيه ؟؟
- عبدالعزيز قلت لك تعال مافيه وقت .. لا تتأخر .. اذا جيت اتصل علي استناك ..
- طيب قوليـ ...!!
- طوط .. طوط .. طوط

عبدالعزيز ما كان عارف وش تبي نوره .... كان يعتقد ان اهلها فيهم شي ... أو محمد صارله شي ..
ماعطى نفسه وقت للتفكير .. ركب سيارته وبأقصى سرعته اتجه لبيت خالته ......


.................................................. .........
.................................................. .............