[همس الصحاري...]

الجــزء الثاني


مرت ايام وشهور وعلياء على هالحال اول ماتوصل البيت ترقد الين اذان العصر وخلاف تنش تصلي وتقعد اشوي وياه اخوانها وخلاف تقعد عالنت الين الساعه 1 او 2 .
.
في يوم الخميس تواعدت علياء وربيعتها هند ووحده ثانية اسمها سلمى ربيعة علياء فالكلية وراحوا حديقة المشرف وقعدوا يلعبون بقطار الموت والسيارات واستانسوا وااااايد وراحت سلمى قبلهن البيت لان امها وصتها انها ترجع قبل اذان العشا لكن علياء خبرت ابوها انها بتطلع من الحديقه وبتروح ويا هند بيتهم .. وطبعا ابوها ما يقدر يررفض لها أي طلب ..
.
.
فبيت هند ..

علياء: ماقلتيلي اشحال خالد
هند : ان شاءالله هاي اخر سنة وبيرد وبيخطبني
علياء: والله بالمبارك اكيد انا اول وحده معزومه
هند: اكيد وهذا يباله كلام
علياء: انتوا تحبون بعض؟
هند : انتي تعرفين كيف اموت فيه وكيف هو يحبني ..
علياء: ياحيج عندج حد يحبج .. هب انا مالت على ويهي ..
هند وهي تضحك : عيل وين الظبيانية ترى محد يحبج كثرها ..
علياء: هههههههههههه والله ضحكتيني ،.. اونها تحبني .. بس متعلقه في دلوع بوظبي ..
هند : هههههههههههه ها دلوع مشكله معلق بنات الشات .. انتي لو صدق ولد جان شو صار بنات الكليه مطيحتنهن وكل وحده معجبه واللي اونها تحب ..
علياء: بس اسكتي ما اداني سوالفهن .. ما اعرف كيف افتك منهن ..
هند : اكيد يوم بيي الريل بيفكج منهن ..
علياء: جب جب انزين .. خلي الريل حقج انا ما اريد اعرس ..
هند : علينا اصلن اللي اتقول ما تبى اتعرس اتحصلين هاي اول وحده تعرس .. لا وثاني يوم درزن عيال وراها ..
علياء: هههههههه يمكن
.
.
وتمر الساعات والضحات تتعالى من حجرة هند ،... ويخطف مايد اخو هند صوب الممر كان ساير غرفته نسى ان هند موصتنه انه ما يدخل البيت اليوم الا عقب الساعه 11 لانها عازمه ربيعتها وربع تحت عند امه فالصاله وسألها منو عند هند فالحجره وقالت له ربيعتها ،.. قال اها اتحرى حد من بنات اختج .. قالت : وليش يعني اتقولها وانت رافع خشمك..قال هن اللي رافعات خشموهن على شو مدرى لا جمال ولا رشاقه يتحرن انهن احسن خلق الله والباقي ولاشيء الله يعين اللي بياخذنهن . فظهر برع وكان يالس في سيارته يتعبث بالشرايط ويغني يودان دان يودان دانه ويوم يوايج برع يشوف سياره واقفه عند باب بيتهم سار عند السياره

دريول علياء: سلام عليكم
مايد: وعليكم السلام خير شوفي
دريول: انا في انتزار ماما علياء
مايد : ابويه انت مغلط ما عندنا ماما علياء
وفي هاللحظه هند توايج من دريشتها واتشوف مايد واقف عدال سيارة قوم علياء وتتصل باخوها.
مايد: الوووه ها هندوه شو تبين
هند: شوتسوي انت
مايد : مدرى ارمس هالبتاني اظني مغلط
هند: لا هب مغلط ها درويل ربيعاتيا خله يدش.
مايد : انزين ،...خان دش داخل
.
.
وسار مايد صوب سيارته .. مايد هب من النوع اللي يطالع البنات.. يعني عمره مااتخيل انه يرمس وحده.. حتى يوم يظهر ويا ربعه كلهم يرقمون ويغازلون الا هو يوقف بعيد عنهم ..
راحت هند توايج من الباب وقالت حق علياء سيري الدرب امان ،.. هند ماانتبهت ان اخوها يالس فالسياره ترى الحبيب مبند الليتات ومنقص على صوت الاغاني كان يرمس ربيعه برهوم..

ابراهيم: ها ميود وين بتسهر اليوم عند خيمة قوم بن غنام ولا المقهى ..
مايد: مدرى والله ،الحين الساعه كم ؟
ابراهيم: تشير الساعه الان الى العاشره مساء وخمس دقائق
مايد : ههههههههه خلاص شرايك نسير السينما..
ابراهيم : انت شو حياتك، كله سينما سينما ..بسك عاد دورلنا مكان ثاني ..
مايد : خلاص بنسير خيمة بن غنام اكيد الربع كلهم بيتيمعون هناك
.
.
وفجاة تنزل علياء من الدري وبالصدفه اتطيح عين مايد عليها تم يطالع مايدري شو صابه.. يبى يشل عينه بس هب قادر شيء يمنعه .. تم وتم يطالع الين ما ركبت السياره ..
ابراهيم على الخط: الوووو الووو..... حووووو ميود وينك وصمخ رد عليه ...
مايد : الو
ابراهيم: شو تسوي
مايد : ماشيء
ابراهيم : بلاه صوتك اتغير
مايد: مادري
ابراهيم: ميود انت صاحي ولاميت
مايد : اثنينتهم
ابراهيم: خل عنك بس انت يالله تعال مر عليه ارقبك لا تتأخر
مايد : انزين الحين ياي
.
.
وهو ساير عند ربيعه ابراهيم يفكر بالبنت اللي شافها، ليش هب قادر ينسى صورتها، ليش اصلن يفكر فيها،تم ساكت ما يعرف شو اللي حصله ..
.
.
عند بيت ابراهيم
مايد: برهوم جد مره حبيت
ابراهيم و هو يضحك: مافي شيء اسمه حب هالايام، ها بس فالمسلسلات والافلام الهنديه
مايد: صدق ارمسك
ابراهيم : بالله عليك خبرني انت هالبنات اللي مطيحات عندك على الماسنجر في وحده منهن اتحبك ولا كلهن مصلحه اللي تباك اتسويلها موقع والثانية حبيبي دخيلك وغلاتي عندك سولي بطاقه ولا هذيج المتفيقه علمني كيف اهكر على ربيعاتي ..
مايد: هيه والله صدقت كلهن معايه ويبون مني شيء اتصدق يوم اعطيهن واسويلهن اللي يبنه ما اشوف رقعت ويوهن ..
ابراهيم : قال شو اونه قال احب .. خل عنك هالخرابيط
مايد: خربطيشن في خربطشين
.
.
رد مايد البيت الساعه 12 وبعده يحس بشيء غريب بداخله لكن يحاول يتجاهله لان ماقدر يفهمه
دخل غرفته يبى يدخل على النت ويحصل الخط مشغول ، سار عند هند دق الباب
.
.
مايد: هندووووه
هند: ها شو تبى
مايد :فجي الباب
هند: الباب مفتوح تعال
مايد: شو يالسه اتسوين
هند: يالس ارمس ربيعتيه
مايد: اعنبوا توها كانت عندج وبهد اترمسينها
هند وهي مستغربه : وانت اشدراك اني هي نفسها
مايد: احساس قلبي
هند: وبويه عليك انت يابو احساس محد يروملك خطير اخويه فديته
مايد: هب انا اخوج اللي تحبينه وتتفدينه بطلبج منج شيء ،... سيري سويلي شاي حليب
هند: افففف هذيلا هم محد يعطيهم ويه ،.. اصبر بقولها حق ربيعتيا برب ..
مايد : احسن قوليلها تصبحين على خير
هند: لا اخويه حبيبي انت عطني بعد عشر دقايق وببند عنها
مايد : انزين بس عشر دقايق .. يالله وين الشاي حليب
.
.
وسارت هند تركض على المطبخ .. وسار مايد صوب الكمبيوتر يلس اشوي يقرا الكلام اللي كاتبتنه اخته لربيعتها وضحك على سوالفهن وشل الايميل وسارغرفته..وقعد يشرب الشاي حليب و يسوي توقيع حق وحده من اللي عنده على الماسنجر كان قاعد ملان ما يعرف شويسوي ومحد عنده اون لاين .. خطر في باله انه يضيف "ماتنسى" هذا ايميل علياء.. وطلع عند علياء مسج ان في حد بيضيفها فسوت اوكي
.
.
السولعيه : يالصدفه ما احلاها .. ماكنت ادري انج موجوده هالوقت ..
دلوع بوظبي: اختي طاعي النك عدل انا واحد هب وحده ..
السولعيه : اوه سوري بالغلط اخويه اسمحلي ما انتبهت ..
دلوع بوظبي : لاعادي اختيه ما حصل الا الخير .. بس من وين يبتي ايملي..
السولعيه : مدرى حصلته من الفورورد
مايد : اوهو شالسالفه معقوله اني كتبت الايميل غلط ..بس انا متاكد انه هالايميل .. ياريال طبها واذكر الله ..
السولعيه : اسمحلي اخويه انا بترخص عنك الحين بسير ارقد
دلوع بوظبي : تصبحين على خير
السولعيه: ماتبى شيء
دلوع بوظبي : سلامتج
السولعيه : انزين لو تبى رقميا ترى عادي لاتستحي قول
دلوع بوظبي : ههههههههههههههههههه لا اختيه انا هب مال هالسوالف .. سيري الحقي عن يطوفج الرقاد
السولعيه : سوالفك ماتنمل بس الرقاد احلى يالله باي
دلوع بوظبي : مع السلامة
.
.
واليوم الثاني عقب الغدى في بيت هند .. الكل قاعد يشوف تلفزون ومايد كان يتعدل عند المرايه ويغني : ماتنسى ماتنسى مهما علي قلبك قسى عندي امل في شوفتك علو وعسى علو وعسى اااااااه علو وعسى علو وعسى ..

قالت هند : تراكم لوعتوا بجبدي بـ هالاغنيه
مايد: لاتقولين لهاالدرجه صوتي يلوع بالجبد ، عيل برهوم قاص عليه ويقول اطربنا بصوتك الشادي صوت الراعبي الموسيقي ..
هند: لا صوتك حلو بس هالاغنيه دوم علايه اتسمعني اياها حتى ايميلها كاتبتنه باسم هالاغنية متخبله على سعيد السالم مدرى ليش ..
.
.
مايد سيده اتذكر سالفة الايميل واتأكد انها هي البنت هب واحد غيرها .. نفس اليوم بس فالليل دش مايد على الماسنجر وما حصل اللي يباها داخل .. تم متضايق ..وقعد يسولف ويا ربعه الموجودين وفجاه " لقد تم تسجيل دخول دلوع بوظبي " وفز قلب مايد من مكانه وتمت ايديه ترتجف يبى يكتب هب قادر ... تم قلبه يدق بسرعه مب عارف شو فيه
.
.
دلوع بوظبي : السلام عليج يالسولعيه .. ها رقدتي عدل البارحه ..
السولعيه : هلا هلا والله وينك انت انا من الصبح ارقبك
دلوع بوظبي وهو مستغرب: ليش اختيه في شيء؟
السولعيه : لا الغالي بس حبيت اطمن عليك بخاطريه اسولف وياك ..
دلوع بوظبي: ههههههههه لهاي الدرجه ... ليكون حلمتي فيني
السولعيه : هيه حلمت فيك انت فارس احلامي اتصدق انا احبك
دلوع بوظبي: اختيه انتي فيج شيء توني ثاني يوم ارمسج مايمديج تحبيني
السولعيه : انت ليش ناوي تعذبني
دلوع بوظبي : والله هب ناوي اعذبج .. وماعاش اللي يعذبج .. بالعكس انا تهمني راحتج
السولعيه : والله
دلوع بوظبي: هيه والله وليش تبيني اجذب عليج ..
مايد وهو خلاص ذايب ،.. حس ان هالانسانه غير عن كل اللي يعرفهم على الارض ، كل يوم تجذبه اكثر باسلوبها وفنها .. ومرت اسابيع وهم على هالحال ..ويوم من الايام
السولعيه : دلوعي...بقولك شيء بس دخيلك ما اريدك تزعل مني
دلوع بوظبي : قولي الغاليه ولا بزعل منج ..
السولعيه: بصراحه بقولك كل شيء بس ما اريدك تعصب ولا تقاطعني.. انا بصراحه واحد هب وحده وادرى انك بتسويلي بلوك ودليت لكن صدقني الشيء اللي استوى هب بيدي كله غصبن عني
دلوع بوظبي وكل علامات التعجب في ويهه : مادري ليش حسيت انك واحد
السولعيه : بس تدرى انا اشم فيك ريحة عطر نسائي مادرى ليش ..
دلوع بوظبي: ههههههههههههههه لا تخافين هب مواعد ولا قاعد عند ربيعتيا
السولعيه : انزين مافي شيء بخاطرك تبى اتقوله ...أي شيء
دلوع بوظبي : هيه في بس ما تزعل مني ولاتغيض.. انا تراني بنت هب ولد ..
مايد اونه مستغرب : بنت!!!!!!!!
دلوع بوظبي : ها دليت وبلوك صح
مايد : لاطبعا مستحيل .. ان مسحتج بكون كتبت الموت لحياتي ... عليا ء انا ......
علياء وهي مستغربه : كيف عرفت اسميا ؟؟؟
مايد : علياء انا مدرى شو استوابي يوم شفتج والله انج ساحره سحرتيني ماقدرت اشلج من افكاري ليل نهار قلبي ينبض باسمج .. ليش انا وليش انتي بالذات من بد هالخلق كلهم
انا يوم حبيت .. ماغصبت قلبي يختار الانسانه اللي هو يباها .. انتي دخلتي بروحج كان الباب مفتوح لج .. ماقدرت اصد عنج او اتناساج ساعه .. انتي ملكتي قلبي وحياتي وكل مافيه علياء انا احبج .. وخبرها كل السالفه وكيف عرفها وشافها ..
علياء: تمت ساكته ما اتعرف شو اترد عليه...
مايد: ادرى انتي منصدمه الحين انا اعذرج خذي راحتج .. ومصيري بيدج يا اما انج ترحميني او انج تكتبين همومي وترسمين عذابي .. بس صدقيني انا بكون راضي حتى لو جتلتيني .. لانج حياتي ..
علياء: باي
مايد: ياصاحبي لاتبتعد من دون زله او سبب***خلك على طول المدى نبقى حبايب للأبد

وتظهر علياء من الماسنجر ولا ردت على مايد باي حرف ...

اتريا ردودكمـ