يلعنك يالحاجه تهينيـن الأحـرار
وتعظّمين اللاش لوهـو دجاجـه
اللاش ولد اللاش بيطار الأعـذار
وجه الفلس يلبس من الكبر تاجـه
مطالب الأخيار بيديـن الأشـرار
هذي تصاريف الزمن واعوجاجـه
عيباً على الرجال يسقـط وينهـار
ما تاقف الدنيا على شـان حاجـه
يا حيف يا فكراً مشتـت ومحتـار
ما تدري ان الضعف عيب وسماجه
ما تدري أن الله عليمـاً بالأسـرار
اسجد لربـك بالخفـا ثـم ناجـه
ما تدري ان الوقـت زايـل ودوار
وماتدري أن السيل يقفى العجاجـه
مافيه حـي إلا تعـرّض للأكـدار
ومافيـه حـي إلا تعكّـر مزاجـه
عن ماضي التاريخ تنبيك الأخبـار
ماصار كرب إلاّ قضـا بانفراجـه
خلك على ميلات الأيـام صبّـار
حاسدك من زودك يبين انزعاجـه
صبر الجمال وعين عمار بالنـار
خل العفـون يكثـرون اللجاجـه
لا بد من رفع العزيمه بالاصـرار
ولا بد من كسر الخجل بالمواجـه
للوقت صـولاتٍ وللكسـر جبـار
إلا انكسار النفس كسر الزجاجـه
شرب القراح بذل زرنيخ وامـرار
والعز يكفي عن قراحـه هماجـه
شقر الحرار سرورها هجر الأوكار
والقلب مشيه بالبـراري علاجـه